बदलापूर – बदलापूरमधील ठाणेकर इंटरनॅशनल स्कूलमध्ये विद्यार्थ्यांच्या नेतृत्वगुणांना, आत्मविश्वासाला आणि जबाबदारीच्या भावनेला प्रोत्साहन देणारी इन्व्हेस्टर सेरेमनी उत्साहपूर्ण वातावरणात पार पडली. विद्यार्थ्यांना शैक्षणिक ज्ञानासोबतच नेतृत्व, शिस्त, निर्णयक्षमता आणि सामाजिक जबाबदारीचे भान मिळावे, या उद्देशाने या कार्यक्रमाचे आयोजन करण्यात आले होते.
या सोहळ्याला नगरसेवक आदित्य पाटील प्रमुख पाहुणे म्हणून उपस्थित होते. तसेच शाळेचे संस्थापक अजय ठाणेकर, चेअरपर्सन वैशाली ठाणेकर आणि खजिनदार अद्वैत ठाणेकर यांची प्रमुख उपस्थिती होती. मान्यवरांच्या उपस्थितीत विद्यार्थ्यांना विविध जबाबदाऱ्या आणि नेतृत्वाच्या भूमिका सोपवण्यात आल्या.
इन्व्हेस्टर सेरेमनी च्या माध्यमातून विद्यार्थ्यांना नेतृत्वाची प्रत्यक्ष अनुभूती मिळाली. जबाबदारी स्वीकारताना आत्मविश्वास, शिस्त, निर्णयक्षमता, संघभावना आणि इतरांना सोबत घेऊन काम करण्याचे महत्त्व विद्यार्थ्यांना समजावून देण्यात आले. विविध जबाबदाऱ्या स्वीकारताना विद्यार्थ्यांनीही उत्साहाने सहभाग घेत आपल्या नेतृत्व क्षमतेचे दर्शन घडवले.
शाळेच्या या उपक्रमामागे विद्यार्थ्यांचा सर्वांगीण विकास हा केंद्रबिंदू आहे. केवळ पुस्तकी शिक्षणावर भर न देता विद्यार्थ्यांना प्रत्यक्ष अनुभवातून जबाबदारीची जाणीव करून देणे, त्यांच्यात निर्णय घेण्याची क्षमता विकसित करणे आणि भविष्यातील आव्हानांना आत्मविश्वासाने सामोरे जाण्यासाठी तयार करणे, हा या उपक्रमाचा महत्त्वाचा उद्देश आहे. कार्यक्रमादरम्यान विद्यार्थी, शिक्षक आणि पालकांमध्ये उत्साहाचे वातावरण पाहायला मिळाले. विद्यार्थ्यांच्या नव्या जबाबदाऱ्यांबद्दल पालक आणि शिक्षकांनीही समाधान व्यक्त केले. शाळेच्या व्यवस्थापनाच्या मार्गदर्शनातून विद्यार्थ्यांना नेतृत्वाच्या विविध संधी उपलब्ध करून देण्याचा प्रयत्न या कार्यक्रमातून अधोरेखित झाला. शिक्षणासोबतच नेतृत्वगुण, शिस्त, जबाबदारी आणि सामाजिक जाणीव विकसित करणारा ठाणेकर इंटरनॅशनल स्कूलचा हा उपक्रम विद्यार्थ्यांना भविष्यातील सक्षम आणि जबाबदार नागरिक म्हणून घडवण्यासाठी निश्चितच महत्त्वपूर्ण ठरत आहे.
